Ollo ao piollo!

ACCEDE CUN SÓ CLIC ÁS MIÑAS REDES: Twitter / Facebook / Pinterest / Instagram / Google+ / Correo-e: zaragalladas@gmail.com

sábado, 9 de xullo de 2016

As dúas en punto

As dúas Marías

Coñece a historia das irmás Fandiño
Son as dúas en punto
no reloxo da desmemoria:
pasea a extravagancia
o seu afeite de loucura
Compostela adiante.

É tempo de empoar as máscaras
coa brancura da inocencia
e as cores do teatro,
de engalanar os corpos
cos retallos alegres dun outrora optimista:
cando seren irmás
do anarquismo non era pecado.

Son horas de saír á rúa de ganchete,
bordando amorosas as palabras
para sentiren na alma piropos do aire
esvaecendo nos cerebros
propios e alleos
aldraxes, rexistros, torturas,
rexistros, torturas, aldraxes,
torturas, aldraxes, rexistros,
esquecer os propios corpos
espidos na rúa,
os cranios rapados
á forza;
a miudeza escuálida
do leite con galletas,
a miseria de perder
a guerra
e o traballo,
de vivir de prestado
nos ultramarinos da cidade,
de perder o tellado.

Son as dúas punto
no solpor da tarde.

                A Churrusqueira

Ningún comentario:

Publicar un comentario